د نړیوال اقتصادي فوروم اصلي غونډه نن د سعودي عربستان په پلازمېنه ریاض کې پيلیږي.

دې غونډې ته د نړۍ د څه باندې شپېتو هېوادونو استازي وربلل شوي چې فلسطیني مشران هم پکې شامل دي.

د غونډې ګډونوال تر ډېره په غزه کې د اوسني کړکېچ د هواري او د حماس او اسراییلو تر منځ د اوربند هڅې کوي.

حماس د امریکا او اروپايي ټولنې له خوا ترهګر سازمان ګڼل کېږي.

د امریکا د بهرنیو چارو وزیر انتوني بلنکین د یوه داسې اوربند د ټینګېدو په هدف د نړیوال اقتصادي فوروم په غونډه کې ګډون کوي چې په نتیجه کې یې د حماس له خوا د یرغمل شویو کسانو خلاصون تضمین کړي.

د سعودي عربستان د مالیې وزیر محمد الجدعان پرون ویلي چې د غزې جګړه پر نړیوال اقتصادي وضعیت "خورا زیات فشار" اچوي.

هغه د اقتصادي فوروم د غونډې په درشل کې د سیمه ییز "ثبات" غوښتنه کړې او پر نړیوال اقتصاد یې د غزې تړانګې د جګړې د اثراتو په اړه خبرداری ورکړی دی.

د اوکرایین پوځي چارواکو منلې چې د روسي ځواکونو سختو حملو له کبله په ځینو سیمو کې شاتګ ته اړ شوي دي.

د اوکرایین د پوځ لوی درستیز/اعلي قومندان جنرال اولکساندر سیرسکیي پرون په خپل ټلګرام چینل کې دا خبره کړې ده.

هغه د وضعیت د خرابېدو خبرداری ورکړی.

جنرال اولکساندر زیاته کړې چې ځواکونه یې په پوکروسکیي او کوراخیف سیمو کې له سختو شرایطو سره مخ دي.

هغه زیاته کړې چې قومندانانو د مدافعینو د ځاني خوندیتوب لپاره هغوی له لومړیو کرښو داسې ځایونو کې ځای پر ځای کړي چې دفاع یې نسبتاً ښه کېدای شي.

اوکراییني پوځیان داسې وخت په ځینو سیمو کې د روسانو له سختو بریدونو سره مخ دي چې روسیې د اوکرایین د انرژۍ تاسیسات هم په نښه کړي.

اوکراییني چارواکو له دې سره سره بیا ډاډ ورکړی چې د دوی په خبره دښمن تکتیکي بریاوې خپلې کړي، خو له عملیاتي پلوه یې کومه لاسته راوړنه نه ده کړې.

د ایران پوځ نن یکشنبې نوې جنګي ډرون الوتکې چې تر هدف پورې ځان رسوي او چوي، نندارې ته وړاندې کړې.

دا هغه ډول ډرونونه دي چې روسیه ورڅخه د اوکراین په جګړه کې کار اخلي.

د ایران د دولتي تسنیم خبري آژانس د راپور له مخې، دغه نوي ډرونونه یا بې پیلوټه الوتکې چې تراوسه یې نوم ندی په ډاګه شوی، د روسیې زلا لانسیت Russian Zala Lancetډرون ته ورته دي چې د لومړي ځل لپاره په ۲۰۲۰ کال کې تولید شوي.

تسنیم آژانس په خپل راپور کې د دغې نوې بې پیلوټه الوتکې یوه ویډیو هم خپره کړې ده.

د جرمني خبري آژانس د راپور له مخې، ایران په وروستیو کلونو کې د ډرون الوتکو په تولید کې د پام وړ پرمختګ کړی او د دې هېواد ساخت الوتکو څخه روسي ځواکونو په اوکراین کې زښت زیات کار اخیستی دی.

د عراق پارلمان پرون (شنبې) یو قانون تصویب کړ چې پر اساس یې همجنسپالو ته تر ۱۵ کاله بند په پام کې نیول شوی دی.

د دې قانون پلویان وايي چې دا په عراق کې د «دیني ارزښتونو د خوندیتوب لپاره دی.

خو د همجنسپالو د حقونو مدافعان دا پرېکړه په عراق کې پر جنسي او جنسیتي لږکي یو بل برید بولي.

د رویټرز خبري اژانس د راپور له مخې، په دې قانون کې ویل شوي چې هدف یې د اخلاقي فساد په وړاندې د عراق د ټولنې ساتل دي.

د ارمنستان د کورنیو چارو وزارت وايي، پرون (شنبې) د دغه هېواد په جنوب کې د یوه بس د چپه کېدو له کبله لږترلږه ۵ تنه مړه شول.

د ارمنستان رسنیو د خپل هېواد د کورنیو چارو وزارت د خبرپاڼې پر اساس وویل چې بس له ایروان څخه ایران ته روان و چې د سونیک سیمې د ختان کلي په یوه دره کې ولوېد.

په دې پېښه کې مړه شوي کسان، ایرانیان وو.

د تاجکستان د بهرنیو چارو وزارت پرون وویل، له خپلو وګړو یې غوښتنه کړې چې له عاجلو اړتیاوو پرته دې د لنډ وخت لپاره روسیې ته له سفر کولو ډډه وکړي.

په مارچ میاشت کې د مسکو په یوه څنډه کې د کنسرټونو پر یوه سالون تر یوې وژونکې حملې وروسته روسیې ګڼ کسان چې ویل کېږي د تاجکستان وګړي دي، ونیول.

تاجکستان هم تېره میاشت ۹ کسان چې شک کېږي له هغې حملې سره یې ارتباط درلود، ونیول.

د ترکیې د بهرنیو چارو وزیر هاکان فیدان نن یکشنبه او سبا دوشنبه په سعودي عربستان کې په غزه کې د اوربند د ټینګښت د هڅو په لړ کې خبرې کوي.

د ترکیې ډیپلوماتیکو سرچینو دا خبر پرون ورکړی او زیاته کړې یې ده چې فیدان به په ریاض کې د اسلامي همکاریو سازمان او د عرب لیګ له غړو سره هم وګوري.

یوې سرچینې پرون د نوم نه ښوولو په شرط د فرانسې خبري اژانس ته ویلي، هاکان فیدان به په سعودي عربستان کې د لوېدیځو هېوادونو له ګڼو بهرنیو چارو وزیرانو سره هم وګوري.

د ملګرو ملتونو امنیت شورا د مارچ میاشتې پر ۲۵مه یو پرېکړه لیک تصویب کړ چې په غزه کې د فوري اوربند غوښتنه په کې شوې، خو دا اوربند لا نافذ شوی نه دی.

اسراییلي ځواکونو نن په لوېدیځه غاړه کې د جنین ښار ته نږدې پر دوو فلسطینیانو ډزې وکړې او ویې وژل.

فرانس پرېس اژانس څرګندوي چې د دې پېښې خبر د اسراییل پوځ او فلسطیني چارواکو ورکړی دی.

د اسراییل پوځ په یوه بیان کې څرګنده کړه چې څو تنه وسله‌والو چې په یوه موټر کې سپاره وو، په یوه پوسته کې پر اسراییلي پوځیانو ډزې وکړې.

د فلسطین رسمي اژانس، وفا راپور ورکړ چې په دې پېښه کې دوه تنه نور ټپیان شوي هم دي.

د الکسي ناوالني ملاتړي غواړي چې د هغه په یاد په برلین کې کنسرت جوړ کړي.

ناوالني د روسیې په زندان کې د فبروري په میاشت کې مړ شو.

دا کنسرت د جون په څلورمه دی، دا هغه ورځ ده که ناوالني ژوندی وای نو ۴۸مه کلیزه به یې وه.

د ناوالني ملاتړیو د جمعې په ورځ په ټیلګرام کې د دې کنسرت خبر ورکړ او ویې ویل چې هدف یې دا دی چې دا ډاډ ترلاسه کړي چې د ناوالني نوم او نظریات لا هم اورېدل کېږي.

دوی زیاته کړه، تر هغې چې د ناوالني یاد ژوندی وي روسیې ولسمشر ولادیمیر پوتین به هغه ته ماتې ورنه کړي.

د یو شمېر نورو سندرغاړو ترڅنګ به په دې کنسرت کې د رپ سندرغاړی نوایز ایم سي او د ایګل په نوم د روسیې د هپ هاپ سندرو جوړه برخه واخلي.

جلال اباد ښار ته نږدې په درونټې سیمې کې د غره د ښویېدو په پېښه کې لږترلږه څلور کسان مړه شوي.

ځایي طالب چارواکو او د سیمې خلکو نن ویلي چې د سختو بارانو له امله له غره لویې ډبرې ښویېدلي او دوه مسافر وړونکي موټر یې لاندې کړي.

په ویډیوګانو کې هم چې په خواله رسنیو لاس په لاس کېږي سړک تړلی ښکاري او څو موټر د ډبرو لاندې شوي دي.

د راپورونو له مخې دمګړی د کابل-جلال اباد لار د ټرافیکو په مخ تړلې ده.

جلال اباد او شاوخوا سیمو کې سخت بارانونه شوي او له امله یې سېلابونه راوتلي دي.