د ملګروملتونو عمومي اسمبلې پرون هغه پرېکړه لیک ته رایې ورکړې چې طرحه یې د عربي هېوادونو او فلسطینیانو له خوا وړاندې شوې وه او پر امنیت شورا یې هم غږ وکړ چې د ملګرو ملتونو د ۱۹۴ غړي په توګه د فلسطین د غړیتوب پر غوښتنه غور وکړي.

د عمومي اسمبلې ۱۹۳ غړو د ۱۴۳ مثبتو، ۹ مخالفو او ۲۵ ممتنع رایو په ورکولو سره د فلسطینیانو لپاره یو لړ تازه حقونه او امتیازونه تصویب کړل.

د امریکا متحدوایالتونو د اپریل په اتلسمه د امنیت شورا د هغه پرېکړه لیک ملاتړ وکړ چې تطبیق یې په ملګرو ملتونو کې د خپلواک دولت په توګه د فلسطین غړیتوب ته لاره اواروي.

دا هغه هیله ده چې فلسطینیانو له کلونو کلونو راهیسې درلوده خو اسراییلو یې مخه نیولې وه.

واشنګټن وايي تمه لري چې مسکو به په اوکراین کې پوځي عملیاتو ته زور ورکړي خو په عین حال کې ډاډ څرګندوي چې اوکراین به د روسیې هرراز نوې حملې په شا وتمبوي او شنډې به یې کړي.

د امریکا د ملي امنیت شورا ویاند جان کربي پرون(د غويي ۲۱مه) په واشنګټن کې یوې خبري غونډې وویل، دا امکان شته چې روسیه به په راتلونکو اونیو کې د جګړې په ډګر کې نور پرمختګ هم وکړي خو هغه زیاته کړه چې متحدایالات د روسیې د عمده بریا اټکل نه شي‎ کولای.

کربي وویل چې د وخت په تېرېدو سره به د امریکا مرستې اوکراین ته دا ځواک ورکړي چې د ۲۰۲۴ کال په اوږدو کې د دې حملو پر وړاندې ودرېږي.

د ښاغلي کربي له څرګندونو څو ساعته مخکې روسي ځواکونه هڅه وکړه چې د اوکرایني ځواکونو د لیکو په ماتولو سره په خارکییف سیمه کې یوه نوې جبهه پرانیزي.

کییف وویل چې ځواکونو یې دا حمله شنډه کړه خو لاهم په دې سیمه کې جګړه روانه ده.

د ایران یوه چارواکي خبرداری ورکړ چې تهران ښايي د خپل اټومي پروګرام څرنګوالی بدل کړي.

د ایران د ستراتیژیکې شورا مشر او د ایران د رهبر ایت اله علي خامنه اي سلاکار کمال خرازي په هغه مرکه چې د الجزیره ټلویزیون له عربي څانګې سره یې پرون پنج شنبه کړې او ترجمه یې ایسنا خبري اژانس خپره کړې ویلي، ایران د اټومي بم د جوړولو لپاره وړ تخنیکي ظرفیت لري، خو فعلا د دغه بم د جوړولو هوډ نه لري.

هغه ویلي دوه کاله مخکې یې هم له الجزیره سره په خبرو کې اعلان کړی و چې ایران د اټومي بم د جوړولو وړتیا لري، اوس هم د ده په وینا دا ظرفیت شته.

د ده په وینا که چېرې ایران ته کوم تهدید پېښ شي، دوی مجبورېږي چې د خپل اټومي پروګرام طریقه بدله کړي.

ویل کېږي، د هغه اشاره اسرائیل ته وه چې د غربي رسنیو په حواله څه کم میاشت مخکې یې په اصفهان کې د ایران اټومي تاسیسات ویشتلي وو.

د اوکراین چارواکي وايي، پر څلورو سیمو د روسیې د توغندیو په تازه حملو کې درې ملکیان وژل شوي او ۱۱ نور ټپیان شوي دي.

د خارکیف والي اوله سینیه­هوبوف ویلي، یو کس په خارکیف کې وژل شوی او بل تن په کوپیانسک کې ټپي شوي دي.

د ده په وینا ۲۱ استوګنځایونه ویشتل شوي دي.

بلخوا د دنیپروپیټروفسک والي سرهي لیساک ویلي، دوه کسان په نیکوپول ساحه کې وژل شوي او ۸ نور ټپیان شوي دي.

په دونیڅک کې هم د یوه کس د ټپي کېدو خبر ورکړل شوی دی.

په عین حال کې د خرسون والي اولیکساندر پروکودین ویلي، یو کس په دې ځای کې ټپي شوی دی.

اسراییلۍ سندرغاړې ایډن ګولان د یورو وېژن سندرو سیالۍ فاینل ته لار پیدا کړې ده.

هغې پرون د سویډن په مالمو ښار کې د ۹۰۰۰ نندارچیانو په وړاندې خپله سندره وویله.

د فرانسې خبري اژانس لیکي، د سندرې د اورولو پر مهال کومه پېښه ونه شوه خو په همدې ورځ له ۱۰ زرو زیاتو کسانو د مالمو په مرکزي چوک کې پر غزه ښار د اسراییل د یرغل خلاف مظاهره وکړه.

مظاهره چیانو غوښتنه کوله چې پر غزه د اسراییلو د برید له وجې دې دغې اسراییلۍ سندرغاړې ته د یورویژن سندرو سیالۍ په نیمه پای یا سیمي فاینل کې د ګډون وخت ورنه کړل شي.

دوی وروسته د مالمو ښار په لارو کوڅو کې خپلې مظاهرې ته دوام ورکړ.

د ټليفون له لارې د رایې ورکولو د پروسې په لړ کې اسراییلۍ سندرغاړې ایډن ګولان د یوروویژن فاینل ته ځان ورساوه.

د سندرو د دې سیالۍ فاینل د شنبې په ورځ کېږي.

د یورو ویژن سندرو سیالۍ په فاینل کې به د ۲۶ هیوادونو سندرغاړي برخه اخلي چې په کې فرانسه، جرمني، ایټالیا، هسپانیا، برېتانیا، سویډن، کرویشیا، قبرس، فنلینډ، ایرلینډ، لیتوانیا، لوګزمبورګ، پرتګال، سربیا، سلووینیا، اوکراین، ارمینیا، اتریش، ایستونیا، ګرجستان، یونان، اسراییل، لیتویا، هالنډ، ناروې او سویس شامل دي.

وسلوالو کسانو په شمالي وزیرستان کې د نجونو یو ځايي ښوونځی په بمونو ویجاړ کړی دی.

پولیسو پرون پنج شنبه ویلي چې په پېښه کې چا ته د سر زیان نه دی اوښتی.

د شمالي وزیرستان په شیوه سیمه کې د دې چاودنې چې د چهارشنبې ناوخته شوې چا مسوولیت نه دی منلی.

د ماشومانو د ملاتړ لپاره د ملګرو ملتونو مرستندوی صندوق یا یونیسف دا بمي چاودنه غندلې او یو بزدلانه عمل یې بللی چې په وینا یې د ګڼو ځوانو او بااستعداده نجونو راتلونکی خرابولی شي.

پولیس وايي، حمله کوونکو لومړی د ښوونځي ساتونکی ډبولی، بیا یې د نجونو په دغه ښوونځي کې، چې ۱۵۰ زده کوونکي یې وو، منفجره مواد ځای پر ځای کړي او چاودنه یې کړې ده.

ټاکل شوې د سعودي عربستان ولیعهد د مې میاشتې له ۲۰مې تر ۲۳مې جاپان ته لاړ شي.

محمد بن سلمان به په توکیو کې د جاپان له امپراتور، صدراعظم او نورو چارواکو سره پر ځینو مسایلو خبرې وکړي.

سعودي عربستان، جاپان ته د تېلو له عمده صادروونکو هېوادونو ګڼل کېږي.

دا به له ۲۰۱۹م کال راهیسې جاپان ته د محمد بن سلمان لومړی رسمي سفر وي.

د جاپان حکومت ویلي چې د سعودي عربستان ولیعهد به له امپراتور ناروهیتو سره د غرمې ډوډۍ وخوري او له صدراعظم فومیو کیشیدا سره به خبرې وکړي.

د جاپان د حکومت ویاند یوشي­ماسا هیاشي د نورو جزییاتو له ورکولو پرته خبریالانو ته وویل، صدراعظم کیشیدا به پر دوه اړخیزو همکاریو، پر هغو مسایلو چې منځنی ختیځ یې اغېزمن کړی او نورو موضوعاتو خبرې وکړي.

مصر ویلي، که حماس ډله او اسرائیل غواړي په غزه کې د اوربند د ټینګېدو او د یرغمل شویو د تبادلې پر سر موافقه وشي، باید له ځانه «انعطاف» وښيي.

په غزه کې د اسرائیل د جګړې اوومه میاشت ده او لا یې هم د ختمېدو کوم څرک نه تر سترګو کېږي.

راپورونه وايي د تازه مذاکرو تر بې نتیجې ختمېدو وروسته اسرائیل بیا په غزه کې خپلې حملې شدیدې کړې دي.

د مصر د بهرنیو چارو وزارت نن جمعه په یوه اعلامیه کې ویلي، د دغه هېواد د بهرنیو چارو وزیر سامح شکري او د امریکا د بهرنیو چارو وزیر انتوني بلېنکن په ټلیفوني خبرو کې د ښکېلو لوریو د انعطاف منلو پر اهمیت ټینګار وکړ او له دوی یې وغوښتل چې د اوربند پر موافقه د سلا کېدو او په غزه کې د بشري غمیزې د ختمېدو لپاره هره لازمه هڅه وکړي.

حماس چې د امریکا متحد ایالتونه او اروپايي ټولنه یې یو تروریستي سازمان ګڼي نن جمعه ویلي، هغه مرکچیان یې چې روانه اوونۍ د اوربند پر سر د خبرو لپاره په قاهره کې وو، اوس دوحې ته روان شوي دي.

حماس وايي، اسرائیل د اوربند هغه پېشنهاد چې منځګړو ورسپارلی و، رد کړی او انتقادونه یې ورباندې کړي دي.

د مصر له حکومت سره نږدې خبري اژانس القاهره پرون پنج شنبه راپور ورکړی و چې د اسرائیل مرکچیان هم له قاهرې روان شوي دي.

د جرمني د دفاع وزیر بوریس پیستوریوس(Boris Pistorius) اعلان کړی چې د اوکراین لویدیځ متحدان به کیف ته د هایمرس توغندیو درې سیستمونه ورکړي.

پیستوریوس دغه څرګندونې له خپل امریکایي سیال لویډ اسټن سره تر ملاقات وروسته پرون د مې په نهمه نېټه وکړې.

د هایمرس توغندیو سیستم چې پر لاریو نصبیدای شي، په یوه مهال څو پرله پسې هدایت شوي توغندي توغوي.

تراوسه چې اوکراین ته کوم توغندي ورکول شوي، اتیا کیلو متره مزل وهلی شي.

د امریکا د ملي امنیت د سلاکار ویندوی جان کربي پرون (پنجشنبې) وویل، په رفح کې ستر عملیات به د حماس د ماتېدو سبب نه شي.

ښاغلي کربي پرون (پنجشنبې) خبریالانو ته وویل، پر رفح حمله به د حماس د سختدریځې ډلې د ماتولو لپاره د واشنګټن او تل ابیب ګډ هدف پوره نه کړای شي.

د رویټرز خبري اژانس د راپور له مخې، د امریکا له خبرداریو سره سره اسراییل پرون (پنجشنبې) وویل چې په رفح کې د عملیاتو پلان ته دوام ورکوي.

په عین حال کې راپورونه ښيي چې د غزې د جنوب په رفح ښار کې د اسراییلي ځواکونو شمېر په زیاتېدو دی.

دا په داسي حال کې ده چې ملګري ملتونه، د غزې اوسیدونکي او مرستندویان وايي چې پر رفح د اسراییل د برید په صورت کې به انساني ناورین رامنځته شي.